未來外母獅子開大口話要$38,000禮金

是咁的，我同女友打算下年結婚，酒席D我哋暗地裡已經plan好曬、落埋訂，琴晚就同女友屋企人食咗餐飯諗住傾禮金。
「世伯、伯母，我哋諗住下年年底結婚。」
伯母一聽到，笑到四萬咁口：「好呀！我D世侄都結得七七八八，你哋早就應該拉埋天窗啦，哈哈！」
「哈哈，咁禮金方面，你覺得跟返公價有冇問題？」

伯母：「公價三萬八系咪？」
「咩話？三萬八？我諗住三千八咋喎！」
話口未完，伯母面色一沉，成台靜到落針可聞。
半晌，伯母終於出聲：「阿波，你一開始應承咗話會同阿女結婚，我先俾你哋行埋。點知拖下又一年，拖下又一年，你話要準備又循序漸進又儲錢又盛，足足拖咗十七年，十七年你就系儲咗三千八？」
你老味呀！狗眼看人低！三萬八我唔系冇，呢幾年我都算撈得唔錯，一年加8%人工，但如果你又問我攞三萬八、茶餐廳又話加我價、物管又話要攞我幾百，咁仲得了慨？最緊要系我哋酒席 book 咗間大酒店，即場拆埋人情都系僅僅夠埋單咋！八婆！
「伯母，講下道理好喎！你而家又唔系賣女，禮金呢家嘢，有咪得羅！三千八你脆脆地『袋住先啦』！」
「而家唔系話要賺你，但你哋結婚，我哋女家起碼都要打對龍鳳鐲，三千八邊夠？
你頭先自己都識講有公價，公價平極都三萬八，先啱啱夠打金。」

「嗱，伯母你聽住，據我所知，我識慨朋友入面數埋都系得兩個禮金系畀三萬八，咁三萬八點會系公價呢？」
我冇講大話，實情系，佢哋多數都唔止三萬八，有D仲畀十萬八、廿萬八添！

伯母聽完嬲到震，發難話：「總之冇三萬八就冇得傾！」
見我哋劍拔弩張，女友就諗住打圓場：「大家一家人有商有量，點解要企到咁硬呢？三千八同三萬八之間其實仲有好多走盞慨空間，例如三千八百零一，系咪又值得傾下呢？」
「好啦，我提供多個方案：一系三千八港紙，一系三萬八千Yen！」

豈料伯母竟然拍台大叫：「仆街打靶仔！你耍鳩我呀？」
「嘩乜你講粗口咁暴力！而家有得你揀你仲想點？有禮金，你真系唔要？其實大不了我咪唔結，伯母你好好諗清楚，我系你就『把握機會，實現嫁女』喇！」
講到呢度，由頭到尾一言不發慨世伯終於開口：「你哋好嘈好煩呀，三千八又好，三萬八又好，咪一樣，關我咩事？是但啦，冇所謂！…」